Kilti
«Djoumba pou dlo ble » se yon rekèy powèm André Fouad ekri ki sòti nan edisyon Freda nan lane 2022.
André Fouad se yon powèt pwolifik. Komedyen, jounalis, animatè atelye, André Fouad resevwa yon dividal pri literè depi lè li koumanse fè pwezi sa gen plis pase 30 an. Nan «Djoumba pou dlo ble » André Fouad gade rapò nou ak lanmè. Se sou lanmè nou te vini. Se sou lanmè souf nou pwale. Otè a travay sou yon tematik anpil powèt peyi Dayiti travay deja. Li rive dekouvri yon mizik, yon silans, yon souf ! Nou salye powèm li yo.
N daku ya
Lanmè a tèlman bèl li jouke m
Jiskaske mwen vin pòtre drivayèz
Mwen niche pye vag yo toupatou
Jouk mwen ayik
Foli m make chak kadans li
Epi mwen tanmen ekri pwezi-mizik kòn lanbi
Wòch galèt kache
Agwetawoyo sèl long vi m
Sèl marasa koukouy mwen
San manti cheri lanmè a fout anraje
Kite bèl dèyè tèt li
Li fè m kouri a kat pat
Lè l soufle nan tout twou pòt kò m
Timoun o! Timoun o! Men lanmè
Lanmè o! Lanmè o! Men timoun
Fanm o! Fanm o! Men lanmè agwetawoyo
Lanmè o! Lanmè o! Men fanm
N daku ya
N daku ya
N daku ya
Gad jan lavi bèl
Lè fanm pran plas lanmè.
Vibrasyon
Chak fwa mwen gade foto sa
Mwen retranpe kè m ak yanvalou souvni
Lanp tèt bòbèch
De ba savon lave
Yon lesivyè ap satouyèt
Dlo wòch la rivyè
Lanmè lave pye vil yo
Kimen rèv nan kwen menm.
Gade l
Dlo desann kouri nan rigòl
Nwaye kè papiyon plen bouch
Mwen pote flè linosans
Chak zwazo tonbe andetrès
Pa mande m pouki e kouman
Si mo m yo pran nan pwa grate
Tout jounen
Tout lannwit.
